Новата долга листа на новинари и политичари, вклучително и поранешен премиер, чии телефони наводно биле прислушувани со нелегалниот шпионски софтвер „Предатор“ објавен вчера од списанието „Документо“, предизвика шок во Грција и ја стави на тест демократската нормалност на земјата.
Таканаречениот скандал „Грчки Вотергејт“ ја потресе грчката политика во последните месеци бидејќи беше откриено дека опозициските политичари и новинари биле прислушувани од државата.
Но, новата листа на жртви на „Предатор“ објавена од новинарот Костас Ваксеванис, сопственик на весникот „Документо“, го разгорува огнот бидејќи вклучува министри и нивните сопруги од актуелната влада на Нова демократија и повеќе истакнати новинари и деловни луѓе.
Поранешниот конзервативен премиер Андонис Самарас исто така е на списокот на прислушувани, како и актуелниот министер за надворешни работи Никос Дендиас.
Според извештајот, сите политичари на списокот се луѓе на кои Мицотакис не им верува или се замериле на лидершипот на партијата.
„Документо“ беше единственото списание исклучено од државното финансирање од страна на владата на Мицотакис за време на пандемијата во контроверзната кампања „Остани дома“.
Новинарот Ваксеванис тврди дека има докази што ќе ги достави до главниот обвинител на земјата, кој во меѓувреме започна истрага за скандалот со прислушувањето.
Мицотакис засега молчи за новите докази. Портпаролот на грчката влада, Јанис Оиконому, даде изјава во која вели дека новата листа на прислушувани треба да биде испитана од правосудните органи, но во исто време започна личен напад против Ваксеванис, нарекувајќи го „клеветник“.
Критичарите сугерираат дека Мицотакис нема да ја преживее ситуацијата, особено ако влезе Европол или ако властите на ЕУ го покренат прашањето за владеењето на правото, како што тоа го направија со Унгарија и Фондот за закрепнување.
Владата призна дека вршела „законски“ надзорни активности од страна на тајните служби против новинари и политичари без користење на Predator, но досега одбиваше да ги открие причините поради кои се повикува на аргументот „национална безбедност“.
Мицотакис рече дека не знаел за такви активности и покрај донесувањето закон со кој тој ги има сите надлежности над разузнавањето. Сепак, неговиот шеф на кабинет и внук Григорис Димитриадис и шефот на тајните служби поднесоа оставки по откривањето на активностите за шпионски софтвер.
Истражен комитет на Европскиот парламент минатата недела беше во Атина за да го испита скандалот, а пратениците на ЕУ рекоа дека заминале со повеќе прашања отколку одговори.
„Параноичниот грчки премиер е обвинет дека ги ставил под надзор луѓе за кои се сомневаше дека се против него, вклучително и неговата придружба. Ова објаснува зошто Мицотакис не се појави пред националниот или европскиот парламентарен истражен комитет“, напиша вчера белгиската европратеничка Саскиа Бримонт на Твитер.
Главната опозиција Сириза побара од владата веднаш да го забрани шпионскиот софтвер, да ги принуди компаниите кои поседуваат Predator да обелоденат кои се нивните клиенти во Грција и да го расветлат скандалот пред општите избори кои треба да се одржат во 2023 година.
Сириза, исто така, бара смена на актуелниот шеф на тајните служби, кој одбива да открие какви било информации во врска со скандалот повикувајќи се на „националната безбедност“.
Извор: Еуроактив