Гренланд порача дека „не е на продажба“ по јавно искажаната желба на американскиот претседател, Доналд Трамп за купување на најголемиот остров во светот, пишува „Би-Би-Си“. Првиот човек на САД на состаноците и вечерите со своите советници, наводно, ја разгледувале идејата за купување на Гренланд кој е автономна територија на Данска. Но, Владата на островот категорично ја отфрли таквата можност и порача дека е отворена за соработка, но не и за продажба.

Весникот „Вол Стрит Журнал“, кој прв ја објави намерата за купување на Гренланд, тврди дека претседателот за неа говорел со „различни нивоа на сериозност“. Извори, пак, што беа цитирани од други медиуми со различни гледишта. Едни сметаат дека Трамп се шегувал додека други виделе сериозна намера кај претседателот за проширување на територијата на САД.

„Гренланд е богат со природни ресурси како минерали, најчиста вода и мраз, големи залихи на риби, морски плодови, обновливи извори на енергија и има огромен потенцијал за авантуристички туризам. Отворени сме за економска соработка, за продажба не“, стои во пораката на Министерството за надворешни работи на Гренланд објавена на социјалните мрежи.

И премиерот на Островот, Ким Киелсен, го повтори таквиот став во посебно обраќање.

„Гренланд е самостојна територија на Кралството Данска и како таков мора да се почитува. Би сакале да соработуваме со САД и во тоа нема сомневање, но независни сме и самите одлучуваме кои ќе бидат наши пријатели“, нагласи Киелсен.

По Австралија, која се дефинира на континент, Гренланд е најголем остров во светот и автономна територија на Данска.