Интервју со поранешната амбасадорка на Грција во Македонија, Дора Гросоманиду за НОВАТВ во кое говори за постигнатото решение, за тоа како ќе се прифатат Македонците и македонскиот јазик, за грчката политичка сцена, за предизвиците со кои се соочува Ципрас и за улогата на меѓународната заедница
Какво е Вашето мислење за постигнатиот договор?
Гросоманиду: Ова е најдоброто нешто што можеше да се постигне во дадените околности. Мислам дека ова е вин – вин решение. Јас сум многу позитивно изненадена од успехот.
Постојат ли услови договорот да биде прифатен во грчкиот Парламент со оглед на односот на силите?
Гросоманиду: Договорот нема да биде усвоен од Парламентот пред крајот на есента, односно пред да бидат исполнети условите од ваша страна. Сметам дека мнозинството ќе биде обезбедено со независните пратеници, но и со некои други.
Може ли да очекуваме дека Македонците и македонскиот јазик ќе бидат прифатени како реалност во Грција?
Гросоманиду: Да, иако во моментов, по тоа прашање, постои токсичен критицизам. Но на крајот, верувам дека тоа ќе биде прифатено, особено кога говориме за меѓународен договор кој треба да се гласа во Парламентот, а не од учесници на митинзи.
Кои се главните предизвици на премиерот Ципрас?
Гросоманиду: Да ги затвори сите прашања од четвртата евалуација договорена меѓу институциите, која би требало да биде излез од економската криза до крајот на август, потоа намалување на долгот и ратификацијата на гореспоменатиот Договор.
Верувате ли дека овој договор е конечен, имајќи ги предвид ставовите на лидерот на опозицијата кој го критикува договорот?
Гросоманиду: Не знам за што друго размислува Мицотакис, освен да не изгуби дел од гласачкото тело. Затоа тој не е јасен на домашната сцена, за разлика од она што може да го каже надвор, особено во Европската народна партија
Дали сметате дека меѓународната зедница треба да биде инволвирана во процесот?
Гросоманиду: Се разбира. Мислам дека меѓународната заедница треба да биде силно фокусирана на ова прашање. Не заборавајте дека на еден или на друг начин, ние сме на Балканот.