Грчката влада од синоќа е реконструирана. Премиерот Алексис Ципрас направи промени во владатa за да го зголеми рејтингот кој е во опаѓање по нешто повеќе од една година по последните избори. И за да им испрати порака на кредиторите дека владата е одлучна да продолжи да ги спроведува договорените реформи.
Грчкиот премиер исклучи 13 стари министри и заменици, донесе 15 нови лица и го зголеми бројот на министерства од 15 на 18. Во новата влада, која има 49 членови, е засилена и улогата на коалицискиот партнер Независни Грци, со уште еден нов заменик-министер од таа партија.
Неколку изненадувања има во министерството за надворешни работи иако прв човек останува да биде Никос Коѕиас. Во министерството првпат влегува десничарската Независни Грци преку Теренс Квик од партијата на Панос Каменос, кој ги поддржува радикалните ставови на партијата против Македонија. Квик е поставен за министер за грчката дијаспора.
Покрај Коѕиас, на истата позиција како и досега, министер за одбрана останува коалицискиот партнер Панос Каменос, непроменет е и министерот за миграција, Јанис Музалас, а промени нема ниту во министерството за финансии кое во ист состав ги продолжува преговорите со кредиторите, како и во министерствата за туризам и за здравство.
Министерот Никос Папас, одговорен за медиуми, доби ново министерство за дигитална политика, телекомуникации и за информации.
Од владата е исклучен досегашниот министер за образование, Никос Филис, наводно заради несогласувањата со грчката црква околу часовите по веронаука.
Опозициската Нова демократија оваа реконструкција ја нарече “рециклажа” на истата влада и инсистира на тоа дека се потребни предвремени избори.