Собраниската Комисија за европски прашања во рекордно време ја заврши расправата за предлог законот за јавно обвинителство и на Предлог законот за изменување и дополнување на Законот за Советот на јавни обвинители, без прифаќање на ниту еден амандман. Двата закона се веќе проследени на пленарна седница и сега се е во рацете на претседателот на Собранието, Талат Џафери, кој откако ќе потврди дека има двотретинско мнозинство, за кое се верува дека постои, ќе свика пленарна седница за гласање. Ова го истакна претседателот на Комисијата за европски прашања и пратеник од ДУИ, Артан Груби.
Апсолутно сите барања на ДУИ и на заедницата, како што дополни, се инкорпорирани во двата закона.
„Успеавме да воведеме Бадентер во изборот на сите јавни обвинители во Обвинителството за гонење организиран криминал и корупција, успеавме да ја вметнеме и целосната еднаква службена употреба на албанскиот јазик во Јавното Обвинителство и Советот на јавни обвинители, согласно со одлуките пропишани во Законот за употреба на јазиците, како и намалување на критериумите за избор на јавни обвинители при што ќе се обезбеди правична застапеност и на Албанците и на другите етнички заедници во Јавното Обвинителство“, рече Груби.
И самиот изрази верба за постоење на двотретинско мнозинство за гласање на законот за ЈО што го темели врз основа на текот на дебатата во Комисијата за европски прашања и расположението кај пратениците. Груби изрази надеж дека ќе има и друга пленарна седница и оти ќе се усвојат и останатите закони што сега се влезени во процедура.
„Со овие две точки на дневен ред, заедно со уште неколку кои преостануваат во овој мандат, во март или најдоцна во мај да добиеме заслужен датум за отпочнување на преговори за членство во Европската унија“, изјави Груби.
Предлог законот за ЈО помина на Комисијата за европски прашања
Предлог законот за јавно обвинителство помина во матичната собраниска Комисија за европски прашања. Членовите на Комисијата за европски прашања по скратена постапка ги разгледаа Предлог законот за Јавно Обвинителство и Предлог законот за изменување и дополнување на Законот за Советот на јавни обвинители и одлучија да ги проследат на натамошна постапка, односно тие да одат на пленарна седница.
На текстот на законот за ЈО имаше само еден амандман поднесен од пратеникот Сурија Рушиди, кој министерката за правда Рената Дескоска не го прифати и не беше усвоен од мнозинството во Комисијата. Како што објасни претседателот на Комисијата за европски прашања Артан Груби, пратеникот Панчо Минов, иако најавил, сепак не поднел комисиски амандман на законот за ЈО. За законот за ЈО денеска треба да се изјасни и собраниската Законодавно-правна комисија.