Лидерот на ВМРО-ДПМНЕ, Никола Груевски, кој е осомничен во два нови случаи на СЈО, „Траекторија“ и „Талир“, денеска изврши увид на автопатот за којшто е осомничен дека ја злоупотребил службената положба.
Како што пренесоа провладините медиуми, рапорт на Груевски за автопатот Скопје – Штип, му давал техничкиот министер за транспорт и врски, Владо Мисајловски.
Мисајловски изјавил дека автопатот ќе биде готов предвреме од првично планираниот датум, мај 2018 година, а тоа се должело на интензивирање на работата на терен.
„Ова ни беше ветување во програмата, автопатот се гради веќе две – три години од 2014 година. Со неговото завршување патувањето од Скопје до Штип и од Штип до Скопје ќе трае 35 до 40 минути“, рече Груевски.
Покрај Мисајловски, на увидот на Груевски друштво му правеа и пратениците Трајче Димков и Никола Мицевски, како и градоначалниците на Свети Николе, Зоран Тасев, како и градоначалникот на Штип, Илчо Захариев.
Никола Груевски е првоосомничен во случајот „Траекторија“ за злоупотреба на службената положба, односно за местење на тендер за избор на фирма изведувач на автопатите Миладиновци – Штип и Кичево – Охрид. Тој, заедно со екс министерот, Миле Јанакиески, вицепремиерот, Владимир Пешевски, како и уште еден функционер незаконски ја избрале кинеската компанија „Синохидро“ да ги гради делниците, а со тоа го оштетиле буџетот за сума од 155 милиони евра.
Трасата во должина од 47 километри ја гради кинеската компанија „Синохидро Корпорација“, додека како подизведувачи на работите се јавуваат македонските фирми „Гранит“ и „Бетон“ од Скопје.