Лидерот на ВМРО-ДПМНЕ, Никола Груевски, во своето обраќање пред демонстрантите на ДИК, рече дека нема да учествуваат во потенцијално прегласување, бидејќи независните членови на ДИК не биле самостојни туку биле под притисок на странски претставници.
– ДИК донесе незаконски одлуки со цел изигрување на изборната волја на народот. Работата на ДИК се претвори во пародија. Имаме информации за вмешување на некои странски претставници со цел вршење влијание, а во правец на фалсификување на изборната волја на граѓаните. Некои од независните претставници не се независни. Незаконските одлуки на ДИК може да ги корегира Управниот суд и повикуваме да не се врши никаков притисок на Управниот суд од никого, порача Груевски.
Тој потенцираше дека доколку Управен подлегнел на влијанија и ги потврди, како што вели тој, незаконските олдуки и се одземе победата на ВМРО-ДПМНЕ, партијата нема да учествува во прогласувањето и нема да ги признае резултатите.
Додека присутните извикуваа „Никола Никола Никола“, Груевски рече дека немало да дозволи „аболицираниот криминалец Зоран Заев да формира влада со фалсификувана волја на граѓаните на Република Македонија“.
– ВМРО-ДПМНЕ нема да дозволи функционирање на институции со фалсификувана волја и кои го немаат легитимитетот на граѓаните. Државата мора суверено да ги носи одлуките. Некои амбасадори почнаа премногу да се мешаат во внатрешната политика на земјата. Тоа мора да запре. Остануваме отворени за комуникација со сите амбасадори, но некои амбасадори кои почнаа премногу да се мешаат, мора да престанат да го прават тоа, порача Груевски.
– ВМРО нема да дозволи понатамошно мешање во внатрешно-политичките прашања на земјата и бараме да останат во рамките на своите мандати и овластувања како дипломати, рече Груевски, кој порача дека го напуштаат форматот на преговори со амбасадори на други држави.
Лидерот на ВМРО-ДПМНЕ исто така порача дека партијата во иднина нема да прифаќа, како што ги нарече, хибридни решенија, доколку ги нема во другите земји.
– ВМРО-ДПМНЕ нема да прифати и нема да дозволи кантонизација и редифинирање на државата под било какви услови и околности. Ќе се бориме за „десоросоизација“ на Македонија и јакнење на граѓанскиот сектор, кој нема да биде под ничија контрола, рече Груевски меѓу другото.
Тој повтори дека неговата партија е прозападно ориентирана и сака членство во ЕУ и НАТО и стратешки односи со САД, но дека денешниот проглас за да се заштитела демократијата во Република Македонија.