Апелација донесе одлука да не му го врати пасошот на Никола Груевски.
Со одлуката, се одбива барањето на лидерот на ВМРО-ДПМНЕ кој си го бараше пасошот од судот, бидејќи му требало да излегува од земјата, а како доказ за тоа вчера неговите адвокати ја приложија поканата од унгарскиот премиер Виктор Орбан.
Груевски е првообвинет во случајот „Титаник“ за изборни нерегуларности заедно со неговите сопартијци и поранешни министри Миле Јанакиески и Гордана Јанкулоска.
Адвокатите на Груевски, Димитар Дангов и Боро Тасевски вчера на јавната седница на Апелација на која не присуствуваше Груевски, посочија дека враќањето на пасошот не му е потребно на Груевски како личност, туку дека одземениот пасош било деградација за него како лидер, но и за неговата партија, со што ќе се придонело до изолација на партијата.
Адвокатот Дангов се повика и на судската пракса од пред две години кога му беше вратен пасошот на тогашниот лидер на опозицијата Зоран Заев, како обвинет во случајот „Поткуп“.
– Ако во тој речиси идентичен случај, судот одлучил да му се врати пасошот, зошто мерката за Груевски сега по две години да опстојува, рече Дангов, кој на судот и на СЈО им предочи и писмени докази од кои едниот со тековната состојба за имотот на лидерот на ДПМНЕ, и проложи и покана од унгарскиот премиер Виктор Орбан, кој што го вика на гости Груевски.
Обвинителката Лиле Стефанова од СЈО пак истакна дека обвинителството останува на ставот, Груевски да остане без својот пасош и да остане на сила обврската да се јавува во судот еднаш неделно.
Таа се повика на судската пракса, па истакна дека во идентичен случај кога лидер на опозиција беше обвинет за изборни манипулации, посочувајќи го случајот Кампања, во кој обвинет и осуден беше Љубе Бошковски се случило дури и полошо сценарио, односно Бошковски бил во притвор.
Токму, затоа обвинителката побара жалбата на Груевски да биде одбиена.