Изборната кампања на ВМРО-ДПМНЕ започна во Охрид со митинг.
Лидерот на партијата Никола Груевски ја обвини опозицската СДСМ дека спроведувала деструктивното сценарио кое имало за цел редифинирање на државата.
“Веќе на сите им е совршено јасно се. Дури и на поддржувачите на опозицијата им е јасно дека биле изигрувани и дека и бомбите, и протестите, и шаторите, и Диво Насеље, и закрвувањето на Македонците меѓу себе, се било и се уште е, едно големо сценарио против нашата држава и ништо друго. Опозицијата наместо коректив на власта се претвори во симбол на деструкција во државата”, рече Груевски.
Груевски зборуваше и за економските резултати на владата во изминатите години и идните економски чекори и вети 70.000 нови работни места.
“Изборот е помеѓу две алтернативи. Ова е избор помеѓу два концепти, помеѓу двајца кандидати за премиер, јас или Заев. Овие избори се одлука за се` што ви е важно вам и на вашето смејство, но се важни и за Македонија во која живее горд и достоинствен народ, кој е многу мудар и кој добро знае што се случуваше во изминатиот период, кој беше исполнет со проблеми, предизвици и вештачки наметнати кризи. Овие избори се референдум во каква Македоија сакаш да живееш”, кажа Груевски.
Носителот на листата на петтата изборна единица Антонио Милошоски порача дека победата на минатите избори со 200.000 гласови разлика, треба да се повтори и на овие избори. Тој вети нови патишта, нови инвестиции и изградба на марина.
„Патиштата што ги градиме ги градиме за сите, субвенциите што ги доделуваме ги доделуваме за сите, инвестициите кои ги носиме ги носиме за сите… Затоа почитувани, дозволете да кажам една порака за нашите сограѓани Албанци: господинот Заев 10 години не успева да ги излаже Македонците и затоа сега се обидува да ги излаже и Албанците. Не е проблемот што тој многу ветува, проблемот е што тој многу лаже. Кој не го знае скапо ќе го плати на 11 декември или и порано ќе го дознаете и вие. Затоа граѓаните на Македонија знаат кој работи за оваа држава и кој се грижи еднакво за сите“, изјави Милошоски.