Претседателот на ВМРО-ДПМНЕ Никола Груевски, придружуван во партиската делегација со членот на извршниот комитет на ВМРО-ДПМНЕ, Никола Попоски и пратениците Александар Николоски и Владимир Ѓорчев во седиштето на Кознервативната Партија на Велика Британија во Лондон остварија средба со претседателот на владејачката Конзервативна партија, Патрик Меклоглин и потпретседателот на Конзервативната партија Марк Филд.
Од ВМРО-ДПМНЕ соопштуваат дека на средбата се разговарало за повеќе теми и области врзани со стратешките интереси на Македонија за членство во НАТО, мигрантската криза како и аспектите на политичката криза, како што велат од партијата на Груевски, наметната од опозицијата.
– Претседателот Груевски посочи дека државата е силно фокусирана кон зајакнување на економијата и подигнување на стандардот на граѓаните што е суштински важно за целокупниот развој на Република Македонија. На тој план Велика Британија е важен трговски партнер на Македонија и постојат огромни потенцијали што треба да се искористат и ќе придонесат за дополнително интензивирање на меѓусебните економски релации, истакнал Груевски, кој додал дека и покрај штетното влијание од политичката криза, државата успеала да постигне позитивни економски резултати за што сведочел и последниот извештај на Светска Банка – Дуинг бизнис.
Партијата дополнува дека во поглед на политичката криза, која потенцираат, наметната од опозицијата, Груевски истакнал дека е потребно да се стави крај, а изборите биле неопходни, при што граѓаните ќе имаат можност да одлучат за иднината на демократски и фер избори.
Соговорниците се осврнале и на мигрантската криза при што била потенцирана важноста на улогата која Македонија ја има во справувањето со овој предизвик, како и на потенцијалите за соработка на партиско ниво помеѓу ВМРО-ДПМНЕ и Конзервативната партија.
Филд ја изразил поддршката на Конзервативната партија од Велика Британија за ВМРО-ДПМНЕ.
– Македонија може да се гордее со големиот успех и напредокот на економијата, и како што знаете компании како Џонсон Мети и останатите британски компании се голем работодавач во државата, што значи дека стекнале доверба во Македонија. Велика Британија не го остава светот ниту Европа зад себе, и јас се заложувам и сум уверен дека економските односи со Македонија и државите од Балканот се повеќе ќе се зацврстуваат во годините што следат, изјавил потпретседателот на британската Конзервативна партија.
Лидерот на владејачката партија остварил средба и со лордот Тим Босвел кој воедно е и претседател на највлијателниот комитет за европски прашања под кој се наоѓаат седум други подкомитети.
На средбата лордот Босвел ја афирмирал поддршката за Македонија во поглед на остварување на стратешките интереси на државата и напредокот кој се остварува во поглед на економијата, реформите во повеќе сфери и области кои се важни за граѓаните, соопштува ВМРО-ДПМНЕ.