Поранешниот премиер и лидер на ВМРО-ДПМНЕ и уште 20 обвинети во случајот „Титаник“ на Специјалното јавно обвинителство први ќе ја сефтосаат новата заграда на Основниот суд Скопје 1.
Свеченото отворање на новата зграда е закажано за утре, по повод Денот на правосудството, а веќе в понеделник во големата судници треба да се одржи првото рочиште за „Титаник“.
Камен-темелникот на новата барокна зграда на судот беше поставен во 2010 година, а на свеченоста присуствуваа Груевски, како премиер и тогашниот министер за правда, Михајло Маневски.
Инаку, „Титаник“ е првиот случај за кој СЈО поведе истрага во февруари 2016 година, а воедно е и најобемниот предмет, во кој покрај Груевски првообвинети се и екс министрите за транспорт и врски и за внатрешни работи, Миле Јанакиески и Гордана Јанкулоска, пратеникот Илија Димовски, поранешниот шеф на кабинет на Груевски, Мартин Протуѓер и екс генералниот секретар на Владата, Кирил Божиновски.
Во овој предмет обвинети се и разузнавачот Мунир Пепиќ, градоначалникот на општина Пустец во Албанија, Едмонд Темелко, Леко Ристовски, Кирил Тодорвски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска. Обвинета е и поранешната заменичка на министерот за правда, Билјана Бришкоска Бошковски.
Обвинетите се товарат за злосторничко здружување, злоупотреба на средствата за финансирање на изборната кампања и повреда на избирачкото право.