Околу 40 граѓани протестираа пред Судот во Скопје, каде што денеска беше изречена пресудата за случајот „Тенк“. Поранешниот премиер Никола Груевски е осуден на две години затвор, а Ѓоко Поповски помошникот министер во МВР на 6 и пол години. Ова е прва пресуда против Груевски за случаите кои ги покрена Специјалното јавно обвинителство.
Демонстрантите пред Судот извикуваа „Уа СЈО“ и „Слобода за Груевски“. Меѓу пристните беа и поранешниот градоначалник на Скопје Коце Трајановски и на Аердром Ивица Конески, како и Александар Пандов член на ВМРО ДПМНЕ. Но по изрекувањето на пресудата тие не беа пред Судот. За време на протестот на познатиот и верен поддржувач на Груевски и Мијалков, Бате Геле му се слоши, за кратко време беше освестен но сепак мораше да интервенира и Брзата помош.
Протестот на насобраните го обезбедуваше полицијата. Демонстрантите во еден момент се обидоа да ја урнат и оградата , но не успеаја во тоа. Според нив, Груевски бил еден од најчесните луѓе, а Судот го направил „арамија“.
Груевски не присуствуваше на изрекувањето на пресудата за набавката на луксузниот мерцедес. Но, според информации на НОВА ТВ, тој утринава се појавил во Судот каде што се одржуваше продолжението за случајот „Траекторија“. Овој судски процес траеше кратко па беше одложен по барање на адвокатите на Груевски, кои требаше да се појават на изрекувањето на пресудата за случајот „Тенк“.
Адвокатот на Груевски Димитар Дангов по изрекувањето на пресудата кратко изјави дека Судот немал основа да изрече осудителна пресуда, туку пресудата требала да биде ослободителна. За отсуството на Груевски рече дека тоа е негово „лично право“.
Извори од одбраната на Груевски велат дека тој не дошол на изрекувањето на пресудата затоа што „не сакал да ги потпалувал тензиите надвор“ каде што се одржуваше протестот.