Горан Грујевски и Никола Бошковски или Христо Атанасов и Неџби Хасан по речиси три месеци бегство се зад решетки. Македонските разузнавачи, со фалсификувани бугарски пасоши се во притвор во грчки затвор. Постапката за нивна екстрадиција во земјава може да трае четири до шест недели, а кога ќе бидат испорачани ги очекува судење за судските предмети на Специјалното јавно обвинителство – „Таргет“ и „Тврдина“.
За што ќе одговараат Грујевски и Бошковски
Истрагата за предметот со кодно име „Тврдина“ беше отворена на 29 март 2016 година, а за предметот „Таргет“ на 17 ноември 2016 година. Поради нивната поврзаност, при подготовка на обвинението предметите се споени во еден единствен предмет. Обвинението е подигнато на 30 јуни 2017 година.
Поранешниот началник на УБК, Горан Грујевски, е обвинет за „Злосторничко здружување“, „Злоупотреба на службената положба и овластување“ и „Фалсификување службена исправа“.
Никола Бошковски, пак, е обвинет за две кривични дела: „Злоупотреба на службената положба и овластување“ и „Фалсификување службена исправа“.
Според обвинението Грујевски и Бошковски се гонат за нелегално прислушување на илјадници граѓани преку злоупотреба на системите за следење во УБК и за нивно уништување за да нема докази за масовното кршење на човековите слободи и права.
Грујевски е главниот обвинет во „Тврдина“ и „Таргет“, додека Бошковски, според обвинението, е извршителот на наредбите на тогашниот началник Грујовски.
51- годишниот Грујевски и 35- годишниот Бошковски беа во бегство 84 дена – од 26 јули, кога полицијата не ги пронајде во нивните домови . Два дена подоцна, по нив беше распишана меѓународна потерница. Министерот Спасовски тогаш изјави дека се сомнева дека во бегството може да се вклучени и луѓе од судството – и јавно праша зошто одлуката на Врховен за притвор на обвинетите патувала цели 6 часа до МВР.
Грујевски за последен пат се појави пред судот на 3 јули, кога судењето беше одложено. За него, пред повеќе од една година најпрво беше одреден притвор, но Кривичниот суд ја замени одлуката со куќен. Жалбата на СЈО беше прифатена од Апелација, но обвинетите се жалеа до Врховен. Кога Врховниот суд исто така ја потврди одлуката за притвор од Бошковски и Грујевски немаше трага.
Главната расправа за „Тврдина 2“ започна на почетокот на овој месец – сведоците изјавија дека по наредба на Грујевски биле запалени и уништени документи од управата на скопско Блаце. Продолжението на судењето кое започна во отсуство на Грујовски и Бошковски е закажано за втори ноември.