Published: Thursday, October 13, 2016 10:41
На аргентински нисколигаш од околината на Буенос Аирес му е наложено да го поправи кривиот терен на кој ги игра своите натпревар веќе 30 години. Линиерс доби ултиматум – или ќе направи корекции на линиите или ќе биде исфрлен од лигата. Неговото игралиште повеќе наликува на трапезоид отколку на правоаголник.
Она што е уште побизарно во целата приказна е заклучокот во Аргентинскиот фудбалски сојуз (АФА) до кој се дојде преку сателитски снимки на Google Earth. Клубот има рок од три месеци да постапи по наложбите на АФА, во спротивно ќе биде згаснат.
Претседателот на клубот, Марсело Гомез за „кривините“ на теренот сфати по прегледување на снимките од воздух.
„Теренот секогаш правеше проблеми. Бевме свесни дека тоа е нешто што на крај ќе мора да го исправиме. Наредбата стигна изненадувачки за нас“, коментира првиот човек на Линиерс основан во 1987 година.
Директните голови од корнер што во Аргентина се нарекуваат „олимпико“ беа чести на теренот на Линиерс. Поради тоа Силвио Фуентес, поранешен играч на тимот, признава дека се врзал за теренот.
„Секогаш останував по тренинзите да шутирам од корнер. Во кариерата имам девет „олимпика“, пет постигнав овде за Линиерс“, истакна Фуентес.
Некои екстерти коментираат дека кривата гол линија не е толку предност за тој што изведува корнер колку што е проблем за голманите.
„Нашиот терен отсекогаш е со криви линии и никој не забележуваше на тој факт. Противничките екипи се шегуваа со нас меѓутоа знаеја дека теренот е абнормален“, вели Макси Кастано, напаѓач на Линиерс.