Земјите-членки на Советот за безбедност (СБ) на Обединетите нации (ОН) треба да се воздржат од двојни стандарди и да не ги напуштаат основните принципи на светската организација при решавање на судирите, изјави синоќа генералниот секретар на ОН, Антонио Гутереш.
„Додека одбележуваме 75 години на ОН, сакам да упатам посебна порака до Советот за безбедност. Привилегијата на членство носи витални одговорности за одржување на начелата и вредностите на Повелбата, посебно во спречувањето и решавањето на судирите“, посочи Гутереш на отворената дебата во СБ на ОН за почитување на Повелбата на ОН.
Тој додаде дека „актуелните и несогласувањата од минатото не смеат да бидат пречка за акција против денешните закани“.
„Мора да ги избегнуваме двојните стандарди. Но, перцепцијата за двојните стандарди не смее да биде изговор за немање на стандарди воопшто“, истакна Гутереш.
Тој додаде дека „војната никогаш не е неизбежна, тоа е работа на избор и тоа често производ на лесни и погрешни пресметки“. Но, и „мирот, исто така, никогаш не е неизбежен. Тоа е производ на напорна работа и никогаш не смееме да го земаме здраво за готово“, потенцира Гутереш.