Радикално-исламстичкото палестинско движење Хамас повика на ново палестинско востание (интифада) против Израел.
-Признавањето на Ерусалим како главен град на Израел од страна на американскиот претседател Доналд Трамп е еднакво на „објавување војна против Палестинците”, рече водачот на Хамас, Исмаил Ханија во Газа.
Во петок мора да почне „Интифада за ослободување на Ерусалим”, порача првиот човек на организацијата која до пред кратко време беше единствениот властодржец во Појасот Газа. Ханија, исто така, апелираше до палестинската власт да ги прекине сите мировни напори со Израел.
Откако американскиот претседател Доналд Трамп и официјално го призна Ерусалим за главен град на Израел, пристигнаа и најавите за преместување на американската амбасада од Тел Авив во Ерусалим.
Стејт Департментот веднаш ќе ги започне подготовките за преселување на американската амбасада од Тел Авив во Ерусалим, како и ќе започне зајакнувањето на безбедносните мерки за заштита на Американците на Блискиот исток, порача американскиот државен секретар Рекс Тилерсон.
„Одлуката на Доналд Трамп да го признае Ерусалим за главен град на Израел е во согласност со американското гледање на реалноста, со оглед на тоа што парламентот, врховниот суд, претседателството и службите на израелскиот премиер веќе се наоѓаат во тој град“, оцени шефот на американската дипломатија во соопштението.