По денешниот министерски состанок на државите од Западен Балкан, еврокомесарот за проширување и соседска политика, Јоханес Хан, одговарајќи на новинарско прашање рече дека владата треба да се формира на солидна и широка основа.
Тој рече дека нема никаков конкретен предлог за политичките партии со кои во текот на денот има состанок во Собранието и дека дошол само да ги ислуша.
„Не сум имал претходни состаноци во Брисел. Јас сум тука да ги ислушам лидерите на политичките партии и имам јасна порака. Со оглед на тоа каде сме сега, земјата има постигнато многу. Пред две години го имавме Пржино, многу дискусии, два пропаднати датуми за избори, имаше избори кои беа признаени од меѓународната заедница. Важно е да се нагласи дека изборите сами по себе не се крај на процесот, тие се важен и неопходен чекор, а следниот чекор е формирање влада. Се разбира дека има многу предизвици, безбедносни и економски предизвици, има можности за соработка во регионот. Важно е новата влада да се формира на солидна и широка основа и да ја следи европската перспектива. Нема да даваме насоки на ниедна партија како да продолжи понатаму, но сите треба да бидат свесни дека се одговорни за иднината на државата. Сите граѓани се обединети околу европската перспектива, тоа значи многу предизвици во иднината, но и донесување на многу одлуки, а крајната цел е подобрување на иднината на земјата. Колку порано се формира влада, толку подобро, ова ќе биде мојата порака до политичките партии“, одговори Хан.
Тој додаде дека кога се зборува за демократија, владеење на правото и суверенитет, тоа значи дека политичарите на оваа земја ќе мора сами да ја донесат конечната одлука, но тие треба да бидат свесни дека на ЕУ и требаат соговорници кои се залагаат за европската перспектива и кои можат да гарантираат дека можеме заедно да тргнеме на овој пат во следните години.
„Патот кон европската интеграција. Ова е од одлучувачко значење и не треба да се губи време“, рече Хан.