Утре за време на посетата на Македонија на Еврокомесарот за соседска политика и проширување на Европската унија, Јоханес Хан, предвидени се повеќе настани, соопштија од Владата.
Премиерот Зоран Заев ќе има средба со Хан, а потоа делегацијата на Владата предводена од Заев, а во состав од Радмила Шекеринска, Бујар Османи и Никола Димитров ќе одржат средба со делегацијата на ЕУ предводена од Хан.
Во 14 часот ќе има тематска седница на Влада која ќе биде посветена на итните реформски приоритети, а на седницата ќе присуствува и комесарот Хан. По седница Заев и Хан ќе одржат заедничка прес-конференција за медиумите.
Во пресрет на посетата, Хан соопшти дека и владата, но и опозицијата треба да се фокусираат на имплементацијата на итните реформи и на Договорот од Пржино.
„Со континуираната поддршка на Европската унија, земјата конечно ја надмина политичката криза преку добро администрираните избори и формирањето на новата Влада. Сега, новата Влада, заедно со опозицијата, треба да се фокусира на спроведувањето на Итните реформски приоритети и на целосно спроведување на договорот од Пржино“, изјави Хан.
Во Македонија веќе престојува и германскиот експерт Рајнхард Прибе, кој во наредните денови ќе има средби со владини претставници за итните реформски приоритети.