Хашим Тачи, поранешниот лидер на т.н ОВК и поранешен премиер и претседател на Косово, по речиси тричасовното излагање на неговиот бранител Грег Кихо, и самиот накратко се обрати пред Судскиот совет на Специјалниот суд во Хаг. Тој рече дека принципите на вистината и правдата му се многу важни и дека чувствува тага и болка за сите жртви на војната.
„Нема правда кога се прогонуваат невини. Не сум виновен за ниту едно од обвинувањата против мене и подготвен сум да се соочам со тоа и да извојувам успех за доброто на моето семејство и мојата земја“, рече Тачи.
„Бев студент во Швајцарија, политички бегалец и се вратив и се приклучив на ОВК во борбата за слобода. Припадниците на ОВК беа обични луѓе кои ги бранеа своите домови. Целта беше да се добие слобода и демократија на Косово. Војната беше наметната на народот на Косово и тие мораа да ги заштитат своите семејства, деца и земја. Ние сме на вистинската страна на историјата. Луѓето сега живеат во држава во која владее правото“, истакна тој пред Судот.
Тачи рече дека е штета што Судот не може да ги сослуша Медлин Олбрајт, Ричард Холбрук, Робин Кук и Адем Демачи кои би сведочеле во негова корист доколку се живи.
„Пред 13 години Дик Марти напиша извештај во кој изјави дека тргуваме со човечки органи. Кога го слушнав тоа, веднаш побарав од меѓународната заедница да го истражи тоа. Ми рекоа дека Специјалниот суд е главниот начин за истражување, побивање и отфрлање на овие тврдења. На Косово му беа наметнати трговијата со органи и ‘жолтата куќа’. Сега знаеме дека тоа не се случи и дека не е наша вина. Сега тој мрачен облак што се надвисна над Косово е однесен. Никој не може да ја преработи историјата. Тоа е цената на слободата“, рече Хашим Тачи од обвинителната клупа на Хашкиот суд за воени злосторства кој почна процес против него и неколкумина негови соработници.