Хашкиот суд денеска изрече по 12-годишни затворски казни за поранешните челници на Службата за државна безбедност на Србија, Јовица Станишиќ и Франко Симатовиќ-Френки за злосторства на „Црвените беретки“ против несрпското население во Босански Шамац во пролетта во 1992 година.
Судот утврди дека Станишиќ (71), тогашен началник на СДБ Србија и Симатовиќ (71), првиот оперативец на Службата, биле виновни за помагање и поддржување прогон, убиство, депортација и присилно преместување муслимани и Хрвати од таа општина.
Според судијата Бартон Хол, Судскиот совет утврдил дека Обвинителството не ја докажало вината на Станишиќ и Симатовиќ за злосторства во уште пет општини во БиХ, како и во Хрватска, т.е. Книнска Краина и Источна Славонија, во периодот од 1991 до 1995 година.
Пресудата, исто така, утврди дека не е докажано дека Станишиќ и Симатовиќ биле учесници во заедничко злосторничко дело, чија цел била трајно и насилно отстранување на несрпското население од големи делови на територијата на Хрватска и Босна и Херцеговина, јави Бета.
Судскиот совет утврди дека Станишиќ и Симатовиќ знаеле за злосторничкото здружување, но дека обвинителите не докажале дека тие, заедно со другите учесници, ја делат таа злосторничка намера.
Според денешната пресуда, беше утврдено дека и други политички, воени и полициски службеници на Србија, Република Српска Краина и Република Српска биле учесници во тоа злосторничко дело.