Ѓер ја слави петтата титула во женската ракометна Лига на шампиони, трета во низа, по победата над Ростов со 25:24 (полувреме: 15:11) во финалето на Фајналфор турнирот за оваа сезона. На тој начин, унгарскиот состав го потисна австриски ХИПО Нидерестерајх како најуспешен клуб во историјата на натпреварувањето.
Едуарда Аморим Талеска со седум гола беше најефикасна кај старо-новиот европски клупски ракометен првак, шест постигна Анита Гербиц, по три запишаа Кари Братсет, Стине Офтедал и Бернадет Боди. Лидер во рускиот состав беше Лои Абин со седум погодоци, по пет додадоа Јулија Манагарова и Ксенија Макеева.
Ники Грот го заврши мечот со една реализација во последниот нејзин настап за Ѓер и изби на чело на листата на стрелци на завршните турнири во ЛШ со 57 гола.
За МВП на Фајналфорот во Будимпешта е прогласена норвешката голманка Карин Гримсбо која го одбрани ударот на Лои Абин и спречи израмнување во последната секунда од средбата.
Бронзениот медал го освои дебитантот на турнирот, Вајперс Кристијансанд чии ракометарки во малото финале го совладаа Мец со 31:30 (полувреме: 15:16).