Двајца мажи се уапсени за пукањето во холандскиот новинар Питер Р. де Вријс, кој се бори за живот во болница во Амстердам, и во петок се очекува да бидат изведени во судница, соопшти полицијата во средата.
Де Вријс, кој добил повеќе закани за својата работа во покривање на криминалното подземје, бил застрелан со пет куршуми, вклучително и еден во главата по напуштање на ТВ студио на радиодифузерот РТЛ во Амстердам, пренесуваат локалните медиуми
Пукањето предизвика шок и осуда низ цела Европа. Холандскиот премиер Марк Руте го нарече нападот „шокантен и неразбирлив“. Тој за време на прес-конференција рече дека обидот за атентат „е напад врз храбар новинар и исто така напад врз слободниот печат што е толку критичен за нашата демократија“.
– Ова е злосторство против новинарството и напад врз нашите вредности на демократијата и владеење на правото. Немилосрдно ќе продолжиме да ја браниме слободата на печатот, изјави претседателот на Европскиот Совет, Шарл Мишел.
Полицијата во средата соопшти дека 35-годишен Полјак и 21-годишно момче од Ротердам, уапсени во автомобил на автопат во близина на Лајдшендам, се осомничени за директна вмешаност во пукањето и дека ќе бидат изведени пред суд во петок. Третото лице, кое беше уапсено во Амстердам, не е повеќе осомничено.
Полициските извори соопштија дека се извршени претреси на имот на повеќе локации, при што е запленета муниција и уреди за складирање на податоци.
Градоначалничката на Амстердам, Фемке Халсема во вторникот вечерта изјави дека Де Вријс е „сериозно повреден и се бори за живот“.
Таа го опиша како „национален херој“ кој се залагал за луѓето во неволја и ги држел истражителите на прсти. Пукањето беше „брутален, кукавички напад“, додаде таа.
Де Врис е еден од најпознатите новинари во Холандија и често се појавува на ТВ. Славата ја стекна во раните 80-ти години на минатиот век, пишувајќи за подземјето во Амстердам и за киднапирањето на магнатот Фреди Хајнекен. Во 2013 година, киднаперот на Хајнекен, Вилем Холидер, беше осуден за закани кон Де Врис.
Новинарот на 64-годишна возраст достигна ново ниво на слава со својата ТВ-програма, која опфаќаше многу кривични случаи од висок профил и беа емитувани од 1995 година и 2012 година. Де Вријс се здоби со меѓународно внимание во 2008 година со снимање на исповед на човек кој, во автомобил полн со скриени камери, призна дека има улога во исчезнувањето на Натали Холовеј, американска тинејџерка која исчезна на карипскиот остров Аруба во 2005 година .
Претставата ја гледале седум милиони гледачи во Холандија – што ја прави една од најпопуларните неспортски програми во историјата на холандската телевизија.