Во првите три години (2013-2016) од членството на Хрватска во Европската унија (ЕУ), според официјалните статистички податоци, земјата ја напуштиле околу 102.000 лица. Проценки на експертите, сепак, се дека таа бројка е можеби и двојно поголема бидејќи многу Хрвати заминуваат во другите членки на ЕУ „на црно“ и не пријавуваат дека ја напуштиле земјата.
Неофицијално, во посочениот период од Хрватска се иселиле дури 230.000 лица, а ако на оваа бројка се додадат и оние што ја напуштиле државата во 2017 и 2018 година се доаѓа до бројка од преку 300.000 луѓе.
Најголема загриженост за хрватските статистичари претставува тоа што најголем број од новите хрватски емигранти се млади брачни двојки со малолетни деца. Според загрепскиот Институт за јавни финансии, просечната старост на хрватските емигранти по 2013 година е намалена од 41,5 на 33,6 години.
Експерите проценуваат дека до 2050 година, од Хрватска ќе заминат околу 800.000 жители, а во исто време на земјата ќе и бидат потребни дури еден милион нови работници.
И покрај загриженоста на експертите, хрватските медиуми се обидуваат да пробијат приказна дека иселувањето почнало да забавува и дека интензитетот на емигрирањето од Хрватска ослабел.