Две момчиња на возраст од 25 години добија едномесечен притвор за нападот врз ватерполистите на Црвена звезда додека третиот осомничен за инцидентот што се случи на сплитската ривиера е пуштен да се брани од слобода. Сите тројца се товарат за кривично дело – тешки телесни повреди во обид како и за кривично дело – разбојништво во обид пришто одземале маички на белградските “црвено-бели“, јавува новинската агенција ХИНА.
Инцидентот се случи во саботата попладне пред натпреварот меѓу Морнар и Црвена звезда што требаше да се игра во базенот на Пољуд во рамки на регионалната ватерполо лига. Тројцата осомничени најпрво вербално, а потоа и физички ги нападнале гостите од Белград. Во намерата да одземат обележја на нивниот клуб, почнале да ги удираат со раце, со нозе и со палки пришто еден од ватерполистите, во обид да побегне од напаѓачите, скокнал во море.
Хрватската полиција во меѓувреме трага и по останатите двајца осомничени учесници во инцидентот.