Биљал Касами е реизбран за претседател на движењето Беса откако на конгресот на партијата во Скопје доби поддршка од 455 делегати.

По изборот, Касами ги нарече последните превирања во Беса, игри и тенденции за раскол во партијата и оцени дека крилото кое веќе јавно е против него, има цел да ја разори Беса, а не да ги победи политичките противници.

Конгресот го организираше едното крило на Беса, додека минатата недела на конгресот во Тетово на другото крило во партијата за лидер беше избран Африм Гаши. Касами има поддршка од двајца пратеници во парламентот, Фадил Зендели и Теута Биљали, додека другото крило ја има поддршката на Неџбедин Кахремани, Реџеп Мемеди и Африм Гаши.

Минатата недела крилото на Гаши во два наврати на прес конференција објави документи, со кои го обвинија Касами, кого го нарекуваат екс лидер, дека во судот поднел фалсификат документи со имиња на претседатели на ограноци на партијата, кои воопшо не биле избрани.