Социјалдемократите ја почнаа постапката за самокандидирање и номинирање на кандидати за пратеници која треба да заврши околу 12 март. Генералниот секретар на партијата Љупчо Николовски изјави дека партијата дава можност за самокандидирање и на личности кои не се дел од неа.

„СДСМ е отворена партија! Даваме можност за самокандидирање и на личности кои не се дел од СДСМ, а се докажани индивидуи, кредибилни и препознаени во средината, кои ги поддржуваат нашите политики и имаат идеи да ги надградуваат нашите политики. Ве повикувам, сите професионалци, чесни и угледни индивидуи, кои споделувате социјалдемократските вредности, и кои имате порив и определба да направите добро за својата земја, веќе од 7 февруари да доставите кандидатура за пратеник или пратеничка. Програмата на СДСМ носи храбри решенија, приклучете се. На нашите кандидатски листи младите ќе бидат застапени со 30 отсто, а за првпат ќе воведеме целосна родова рамноправност од 50 отсто жени и 50 отсто мажи“, посочува Николовски.

Кандидатските листи за пратеници треба да бидат доставени во ДИК околу средината на март (25 дена пред изборите кои ќе се спроведат по скратени рокови). На 30 јануари Централниот одбор на СДСМ ја утврди процедурата за самокандидирање и за предлагање кандидати за пратеници. Постапката почнува од партиската база, поточно од месните и од општинските организации на СДСМ. Конечниот распоред на листите за пратеници, според најави од партискиот врв, ќе се знае околу 12 март, кога ќе заседава и конгресот на СДСМ.