Кенијката Џемима Сумгонг (32), олимписка шампионка во маратон на Игрите во Рио де Жанеиро, падна на допинг тест и ќе биде под суспензија до изрекување на конечната казна. Потврда на веста стигна од Интернационалната атлетска федерација (ИААФ).

„Таа е позитивна на забранетата супстанција ЕПО по ненајавеното тестирање на ИААФ што беше спроведено во Кенија“, се вели во соопштението на организацијата.

Сумгонг, лани во Рио, влезе во историјата како прва Кенијка со најсјајно одличје во маратонските трки на најголемиот светски спортски настан со време 2:24,04 часа. Во 2016 година победи и на маратонот во Лондон (2:22,58 часа).

Таа има право да побара Б тест кој доколку го потврди позитивниот наод ќе следува суспензија за, најмалку, две години. Сумгонг е само една од 40. атлетичар(к)и од Кенија за кои допинг контролите беа фатални по нивните кариери од 2011 до 2016 година.