Иван Тричковски игра во одлична форма во дресот на кипарски АЕК. Потврда дека е така дојде во мечот со Паралимни во седмото коло од шампионатот. Македонскиот репрезентативен крилен напаѓач постигна хет-трик што, сепак, не беше доволен за три бода на тимот од Ларнака. Конечни 4:4 против претпоследниот состав на табелата за изненадување, но и за заостанување три бода зад лидерот Анортозис.
Тричковски одигра цел натпревар за АЕК од Ларнака, а противничката мрежа ја тресеше во 46. минута од игра и од пенали во 55. минута и во 65. минута за водство на неговата екипа со 4:3. Предноста што ја осигура македонскиот репрезентативец, ја поништи Риера Сито во 73. минута за израмнување на 4:4, резулат што остана непроменет до крај.
Со денешните три, Тричковски стигна до девет гола за АЕК Ларнака во оваа сезона. По два претходно постигна против Пафос и против Омонија и по еден во дуелите со Олимпијакос од Никозија и Ахнас.