Светско клупско првенство со 32 тима е најновиот предлог на претседателот на ФИФА, Џани Инфантино. Планираните промени за натпреварувањето што моментно брои 7 екипи ги сподели преку италијанскиот весник „Газета дело спорт“ пришто најави и поместување на самиот турнир. Наместо во декември како што беше случај досега, мечевите би се играле во јуни, а таквиот формат би бил применлив од 2019 година.
Веста го обиколи светот, но официјални реакции засега сè уште нема. Останува да се види дали оваа идеја на Инфантино ќе помине иако е факт дека распоредот и онака е згуснат. Првичните прогнози се однесуваат за можно несогласување кај фудбалерите од едноставна причина што во тој период од годината размислуваат само на одмори по напорната сезона.
Светско клупско првенство во фудбал се игра од 2000 година, во сегашниот формат од 2005 година. Барселона е рекордер по бројот на титули со три (2009 година, 2011 година и 2015 година), Коринтијанс има две (2000 година и 2012 година), а по еднаш победуваа Сао Паоло (2005 година), Интернасионал (2006 година), Милан (2007 година), Манчестер унајтед (2008 година), Интер (2010 година), Баерн Минхен (2013 година) и Реал Мадрид (2014 година). Свој придонес во единствената титула на „нероазурите“ под водство на Рафаел Бенитез имаше и Горан Пандев. Во финалето беше совладан тогашниот африкански шампион со 3:0, капитенот на репрезентацијата на Македонија беше стрелец на првиот гол.
Бразил беше домаќин на првиот турнир, титулата седум пати се одлучуваше во Јапонија вклучувајќи го и ланското издание и по двапати во Обединетите Арапски Емирати и во Мароко.