Претседателот на ФИФА, Џани Инфантино бара проширување на Светското првенство во фудбал на 48 репрезентации. Според планот на Инфантино, 16 земји би биле елиминирани во прелиминарната нокаут фаза.
А понатаму форматот би останал ист, односно 32 репрезентации би се натпреварувале во групната фаза со понатамошни нокаут рунди.
Како што вели тој, за овој предлог ќе се решава во јануари следната година.
– Идејата е да се најде најдоброто решение. Овој месец ќе дебатираме за идеите и ќе решиме се до 2017 година.
Инфантино ја доби поддршката за претседател на најголемото фудбалско организациско тело во февруари со ветувањето дека ќе го пришири Светското првенство на 40 репрезентации.
Сегашната идеја е пак 32 фудбалски репрезентации да се натпреваруваат во прелиминарна фаза и 16 од нив да влезат во група со 16 кои веќе ќе имаат обезбедено учество во групната фаза.
Сепак нејасно е според неговиот план, по кој критериум ќе се квалификуваат оние 16 кои веќе се селектирани во група.
– Значи дека ќе продолжиме со нормалното Светско првенство со 32 тима но сега 48 би биле дел од целата забава, изјави тој дополнувајќи дека ФИФА сака да го развие фудбалот низ целиот свет, бидејќи Светското првенство е најголемиот социјален настан.