Иницијативата до Уставниот суд за оценка на уставноста на членот 11-а од Законот за дополнување на Законот за помилување од 2016 година е поднесена од тетовскиот адвокат Зоран Стојановски пред три години. Тој за ТВ 24 вести вели дека немал политички мотиви, а единствена цел за иницијативата била заштита на уставноста.
„Целта како и на секоја друга иницијатива пред Уставен суд е зачувување на уставноста и законитоста. Друга цел нема. Политичките анализи се предмет на работа на политички партии, ова е само уставно-судска работа. Нема допирна точка со политика од аспект на тоа како што сака да се прикаже“, вели Стојановски.
Иницијативата ја поднел пред три години, но зошто сега се става на ред не сака да коментира. Според него, иницијативата во врска со Законот за помилување и за Законот за одликувања и признанија треба да биде усвоена и да бидат поништени и едниот и другиот закон. Тоа е моето очекување, вели Стојановски.
Уставниот суд одлучи на седницата во среда на дневен ред да ја стави иницијативата за утврдување на уставноста на член 11-а од Законот за помилување од 2016 година, кој предвидува Претседателот да може да ја повлече дадената аболиција. Со иницијативата се тврди дека не може да се отповика еднаш дадената амнестија.
Со ова Уставниот суд одново ги врати сомнежите дека се прави обид со аболицијата на екс претседателот Ѓорге Иванов од 2016 година, да „паднат“ сите случаи на СЈО против поранешната власт и од кривичен прогон да се спасат сите обвинети и осомничени во овие случаи.
Адвокатот Александар Тортевски за НОВА вели дека ова е обид на уставните судии да ги спасат од кривичен прогон обвинетите и осомничените за злоупотреби.