Експерти на меѓународната организација за забрана на хемиското оружје (ОПЦВ) денеска го посетија сирискиот град Дума, во кој на 7 април беше извршен напад во кој наводно било користено хемиско оружје.
„Според информациите со кои располагаме, специјалната мисија на ОПЦВ на 21 април во претпладневните часови го посетија градот Дума и местото каде наводно се користени отровни супстанци“, се наведува во соопштението на Министерството за надворешни работи на Русија.
Тимот на ОПЦВ пристигна во Сирија на 14 април, но почетокот на истрагата во Дума доцнеше од безбедносни причини.
Руското МНР додава дека безбедноста на експертите на ОПЦВ ја гарантираат сириските и руските сили.
„Очекуваме инспекторите непристрасно да ги истражат сите околности за настаните во Дума и да изработат објективен извештај. Нивната безбедност сега е гарантирана не само од сириската страна, туку и од командата на рускиот контингент во Сирија“, се наведува во соопштението на руската дипломатија.
Во нападот на 7 април во градот Дума, кој се наоѓа во близина на Дамаск загинаа повеќе од 40 лица.
Поради обвинувањата дека нападот со хемиско оружје го извршиле силите на сириската влада, САД, Велика Британија и Франција на 14 април извршија заеднички воздушни удари врз воени цели во Сирија.