Во услови на глобална енергетска криза кога државите мака мачат со сопствените ресурси за нејзино производство и неизбежно купуваат од скапите берзи, Република Северна Македонија по 12 години го стави во функција ТЕЦ Неготино кој овие денови почна да ги испорачува првите киловатчасови електрична енергија. Директорот Небојша Стојановиќ во интервју за НоваТВ, вели дека моментално се произведувале околу 2.000.000 киловатчасови, и дека тоа значело задоволување на количините на електрична енергија во системот. Стојановиќ во интервјуто уште говори за тоа како е рестартиран ТЕЦ-от по цели 12 години, кој се учествувал во процесот, и заштедите што ги прави во домашниот буџет.

НоваТВ: Господин Стојановиќ  Тец Неготино од неодамна  е пуштена во погон за производство на електрична енергија. Нема да претераме ако речеме дека се случи револуција, зашто по цели 12 години Тец-от покажа знаци на живост  и жилавост. Што направивте за да проработи енергетскиот „олд тајмер“ ?

– АД ТЕЦ Неготино неколку дена произведува електрична енергија, по пауза од 12 години, односно од 2009 година, кога последен пат бил  вклучен во процес на производство. Неможе да се каже дека нешто специјално се направи. Редовно во текот на овие изминати години се врши проверка на опремата за работа и обука на вработените. Низ процесите на конзервација на опремата што се врши секоја година се обезбедува заштита на истата. Од тие причини за брз временски период електраната започна со процес на производство.

НоваТВ: Граѓаните секако се интересираат, зошто Тец-от  беше толку години надвор од функција ?

– Надвор од процесот на производство на електрична енергија бевме поради висината на цената на мазутот, кој во тие моменти значеше и висока производствена цена на електрична енергија од страна на АД ТЕЦ Неготино.

НоваТВ: Колку киловатчасови електрична енергија произведувате дневно и што значи тоа за потребите на Република  Северна  Македонија?

– Моментално се произведуваат околу 2.000.000 киловатчасови, тоа значи задоволување на количините на електрична енергија во системот.

НоваТВ: Колку овие дома произведени киловатчасови електрична енергија , ќе продуцираат заштеди во буџетот, средства кои досега се трошеа за купување на струја на скапиот европски пазар?

– Имајќи во предвид дека цената на електричната енергија на берзите моментално е навистина висока, и на дневна основа променлива, со производство на електрична енергија во АД ТЕЦ Неготино, каде цената за производство на мегават-час изнесува околу 175 евра, се остваруваат големи заштеди на финансиски средства. Не би сакал денес да коментирам износ на средства кои се заштедуваат, би оставил процесот да продолжи, па подоцна доколку треба да коментираме.

НоваТВ: Дали Тец-от располага со „А“ интегрирана дозвола и што значи тоа?

– Да, АД ТЕЦ Неготино располага со А интегрирана дозвола, издадена од Министерството за животна средина и просторно планирање. Тоа значи дека целокупното работење на електраната е во согласност со постоечките законски регулативи и стандарди во насока на заштита на животната средина

НоваТВ: Дали мазутот што го користите ги задоволува стандардите за сулфур под 1% ?

– Секако да. ТЕЦ Неготино има обврска и ја почитува обврската за користење на нискосулфурен мазут.

НоваТВ: Ангажиравте дури и порано вработени стручни лица во Тец Неготино, а сега пензионери за да помогнат во рестартот на комбинатот. Што значеше за  нив овој  предизвик ?

– Во изминатите години се случи таканаречена промена на генерации кај вработените во АД ТЕЦ Неготино. При почетокот на процесот на производство исконтактиравме со дел од поранешни вработени во АД ТЕЦ Неготино, и луѓето прифатија да се ангажираат во процесот. Станува збор за луѓе стручни и луѓе со искуство од времето кога електраната била во погон на производство. Ангажманот на овие луѓе беше искористен и за поддршка на моментално вработените, кои нормално, од причина што не учествувале во процес на производтво, или учествувале значително помалку од овие луѓе и немаат толкаво искуство.

НоваТВ: Се наоѓаме пред новогодишните и божиќните празници. Може ли граѓаните да бидат мирни и дека нема да останат без струја или барем без оној контингент киловатчасови што го произведува Тец Неготино?

– ТЕЦ Неготино овие денови произведува електрична енергија и планираните количини засега се произведуваат без некои посериозни проблеми. Имајќи ја во предвид староста на опремата, не можеме  со сигурност да кажеме дека тоа така ќе остане и во иднина. Но, јас искрено се надевам дека нема да се соочиме со поголеми проблеми или дефекти кои би значеле прекин на процесот на производство. Очекувам АД ТЕЦ Неготино да ги произведе планираните количини на електрична енергија.

Мирјана Трпческа