Мечот меѓу Морнар и Црвена звезда што требаше да се одигра во Сплит во рамки на регионалната ватерполо лига е одложен. Причина е нападот врз тројца играчи на „црвено-белите“ на сплитската ривиера попладнево пришто двајцата успеале да побегнат, а третиот се спасил со скок во море. Инцидентот што бил пријавен околу 13.40 часот го потврди и хрватската полиција.

„Еден од нападнатите ватерполисти се спасил во скок во море, а другите двајца побегнале. До нашето појавување на место на настанот, напаѓачите се разбегале. На момчето кое скокнало во море му понудивме медицинска помош, но ја одби. Немаше видливи повреди. Го отпративме до хотелот каде разговаравме со него и со останатите двајца кои успеале да побегнат. Паралелно со тоа, трагаме и по напаѓачите“, изјави Жељка Радошевиќ од сплитската полиција за хрватската новинска агенција ХИНА.

Неофицијално, нападот врз ватерполистите на Црвена звезда бил изненаден. Пред инцидентот, гостите од Белград биле во прошетка на сплитската ривиера и, според шпекулациите на ХИНА, „на локалните момчиња веројатно им паднало во очи тоа што сите биле облечени во маички на својот тим“.

Министерството за надворешни работи на Хрватска најави испраќање на протестна нота на Хрватска поради инцидентот во Сплит во кој беа нападнати ватерполисти на Црвена звезда, најави шефот на српската дипломатија, Ивица Дачиќ за РТС.

„Ќе бараме пронаоѓање на напаѓачите и нивно казнување“, додаде Дачиќ.

Црвена звезда вечерва требаше да гостува на екипата на Морнар на базенот на „Пољуд“ во регионалната лига во ватерполо, но натпреварот е одложен. Раководството на „црвено-белите“ свика вонредна прес-конференција во Белград на која истакна дека ватерполистите биле нападнати од хулигани со шипки бидејќи келнерот во кафе-барот во кој седеле го забележал грбот на Црвена звезда на нивната гардероба.