Пет повредени навивачи на Олимпик Лион од кои еден со убодна рана од непознато оружје е билансот од нередите низ улиците на Барселона што претходеа на шпанско-француската фудбалска пресметка на „Камп Ноу“ во осминафиналето во Лигата на шампиони.
Според проценките, околу 6.000 навивачи на Олимпик Лион кои негуваат добри односи со симпетизерите на Реал Мадрид, допатуваа во Барселона чии делови, на моменти, наликуваа на воена зона и покрај силното полициско обезбедување и преземените мерки за спречување на блиски средби.
Радио „Кадена СЕР“ јавува дека пет Французи побарале медицинска помош, откако, како што тврдат, биле нападнати од група момчиња со обележја на Барселона. Најголемиот инцидент се случил на плоштад во близина на „Камп Ноу“ каде групата приврзаници на Лион, „Бед Гоне“ била дочекана од фракција антифашисти на Барселона.