Интернационалниот олимписки комитет одлучи да не дозволи, спортистите од Русија да настапат под своето знаме на церемонијата за затворање на игрите на Пјонгчанг.
Руските спортисти вчера побараа да се појават под националното знаме на денешното затворање на Игрите. До последен момент Русите се надеваа на компромис, но тоа не беше постигнато.
Членството на Рускиот олимписки комитет во ИОК беше замрзнато на неопределено време на 5 декември, поради бројните допинг-скандали и наводното мешање на државата во нив за време на Олимпијадата во Сочи пред четири години.
На Олимписките игри во Пјонгчанг беа примени само оние руски спортисти, кои докажаа дека не користеле забранети средства. Но и на овие Игри, двајца од нив покажаа позитивни резултати на допинг.
Инаку, рано утрово по европско време, Русија ја победи Германија со 4:3 со гол постигнат во продолжението од финалето на хокеарскиот турни одиграно утринава на последниот ден од Зимските олимписки игри во Пјонгчанг.
За Русите ова е деветто олимписко злато и второ под олимпиското знаме и прво по 26 години во хокеј.