Иран му се заблагодари на Пакистан за неговите напори за посредување во обидот да се зачува примирјето со Соединетите Американски Држави, но во исто време јасно стави до знаење дека засега нема директни преговори со Вашингтон, додека американската поморска блокада продолжува.
Иранскиот министер за надворешни работи, Абас Арагчи, се сретна во Исламабад со пакистанскиот воен командант Асим Мунир, а по состанокот го пофали Исламабад за неговата улога во обидот да се смири конфликтот.
Според соопштението објавено од иранската агенција Тасним, Арагчи ѝ се заблагодарил на „владата на Пакистан, особено на фелдмаршалот Асим Мунир, за воспоставување прекин на огнот и завршување на војната“, додека Мунир рекол дека Пакистан е подготвен да продолжи со напорите за медијација „додека не се постигне резултат“.
Иако Белата куќа објави дека американските претставници Стив Виткоф и Џаред Кушнер патуваат во Пакистан на разговори, иранската страна тврди дека тоа не е трилатерален состанок. Ал Џезира наведува дека портпаролот на иранското Министерство за надворешни работи рекол дека „не е планиран состанок меѓу Иран и САД“ и дека Техеран ќе ги пренесе своите ставови преку пакистански посредници.
Ова значи дека, и покрај интензивната дипломатија зад сцената, клучниот ќорсокак останува нерешен.
Според Ал Џезира, Иран сè уште инсистира на целосно отворање на Ормутскиот теснец и крај на американската блокада на иранските пристаништа, додека нема јасни сигнали дека Вашингтон е подготвен за таква отстапка.
Американскиот претседател Доналд Трамп претходно го продолжи примирјето, но во исто време нагласи дека блокадата останува на сила, што дополнително ја комплицира можноста за брз договор.
Во меѓувреме, иранскиот претседател Масуд Пезешкијан ги повика граѓаните да ја намалат потрошувачката на електрична енергија, тврдејќи дека „непријателите ја напаѓаат инфраструктурата“ за да предизвикаат незадоволство кај населението, објавија иранските медиуми, како што објави Ал Џезира во својот блог во живо.
Во исто време, иранската воена команда соопшти дека е подготвена да одговори ако САД продолжат со блокадата на иранските пристаништа, предупредувајќи дека во случај на нова агресија, може да следи уште пожестока реакција и нови тензии во Ормутскиот теснец, според Тасним.
И покрај цврстите позиции, Исламабад се обидува да го задржи дипломатскиот канал отворен. Ал Џезира наведува дека пакистанските претставници остануваат „претпазливо оптимисти“, со проценка дека самото присуство на иранската делегација и доаѓањето на американските пратеници покажуваат дека интензивната дипломатија зад сцената сè уште не е неуспешна- пишуваат агенциите.