Израелското Министерство за надворешни работи објави дека иранска балистичка ракета ја погоди болницата Сорока во Бершеба.
Болницата Сорока е значително оштетена, вели портпарол, додека израелската служба за итни случаи вели дека повеќе од 30 лица се повредени.
Две лица – маж на возраст од 80 години и жена на возраст од 70 години – се однесени во болница во сериозна состојба, додека уште 30 лица се полесно повредени, претежно од експлозии и шрапнели, соопшти медицинската служба Маген Давид Адом (МДА).
Иранските медиуми објавија дека салво од ракети летаат кон Израел. „Технолошки напредни ракети летаат над Тел Авив“, објави новинската агенција Фарс, додека иранската државна телевизија емитуваше снимки во живо од Тел Авив.
Иран ќе продолжи да го користи своето право на самоодбрана со гордост и храброст, а ние ќе го натераме агресорот да се кае и да плати за својата тешка грешка, напиша иранскиот министер за надворешни работи, Абас Арагчи, на X, обвинувајќи го Израел дека се обидува да „го прошири конфликтот во регионот и пошироко“.
„Терористичките тирани на Иран лансираа ракети врз болницата Сорока во Бершеба и врз цивилите во централниот дел од земјата“, напиша Нетанјаху на „Х“
Тој додаде дека „тираните во Техеран ќе платат скапо“ за нападот, објави „Тајмс оф Израел“.
Во посебен извештај, болничарот Јоси Шило рече дека неговиот тим наишол на голема материјална штета на градилиште. Жена на возраст од 60 години, исто така, била лекувана таму и била однесена во болница во „сериозна, но стабилна состојба“.
Покрај Бершеба, ракетите ги погодија и Тел Авив, Рамат Ган и Холон, предизвикувајќи голема штета, објавија израелските медиуми.
Во меѓу време Иран соопшти дека главната цел на утринскиот ирански напад врз Израел било седиштето на Командата и разузнавачката служба на ИДФ, како и разузнавачкиот камп на армијата во технолошкиот парк Гав-Јам. Иран ги негира извештаите на израелските медиуми дека иранскиот напад погодил болница, наведувајќи дека е погодена локацијата каде што се распоредени израелски војници.