Фудбалерите на Манчестер сити решија да ги покријат трошоците за превоз на своите навивачи за финалето во ФА купот против Вотфорд во Лондон. Потегот на „граѓаните“ во тамошната јавност е протолкуван како обид за нивно искупување или додворување по елиминацијата од Тотенхем во четврт-финалето во Лигата на шампиони.
Од „Етихад“ најавија дека првотимците во составот на Пеп Гвардиола ќе платат за сите 26 автобуси колку што се планирани да тргнат кон „Вембли“ на 18 мај.
„Поддршката од напите навивачи во текот на целата сезона е неверојатна. Сè уште има за што да се бориме до крајот. Ова е наш начин за благодарност до нив“, порача Венсан Компани, капитен на екипата.
Белгискиот интернационалец притоа нагласи оти и тој и неговите соиграчи се свесни за издатоците на кои се изложуваат фановите за присуство на нивните натпревари.
„Трошоците за превоз и за влезници за премиерлигашките или за куп натпреварите без разлика дали играме на домашен или на гостински терен се скапи. Тоа го разбираат фудбалерите. Вака сакаме да помогнеме“, додаде стоперот на „граѓаните“.
Манчестер сити веќе ја освои титулата во Лига купот, а доколку во мај победат во Премиерлигата и во ФА купот, ќе завршат со тројна круна во сезона. Веруваа дека може да станат и прв англиски тим со четири трофеи во што ги спречи Тотенхем во четрвт-финалето во Лигата на шампиони.