Ако се погледне информативната мапа на одделот на НАСА за пожари во светот (FIRMS), ќе се воочи дека речиси и да нема континент кој не се соочува со огнена стихија. Што се однесува до Европа, најпогоден од пожари е источниот Медитеран, со акцент на Италија, на Шпанија, на Грција како и на Турција.

Секојдневните слики и информации што до скоро доаѓаа од Италија беа застрашувачки. Само во еден момент во јужниот дел на Италија имало 800 пожари за кои во најголем број се утврдило дека биле намерно потпалувани. Сето ова покрај што претставуваше и претставува оптоварување за противпожарните служби, им зададе работа на останатите логистички служби кои мораа да евакуираат неколку илјадници население, туристи, па дури и свештени лица, каков што беше случајот со пожарот во близина на Пескара, односно во паркот на природата „Пинета Данунциана“ со површина од 53 хектари.

Противпожарните служби изведоа стотици интервенции од кои најмногу на Сицилија, за која нема да се претера ако се каже дека е буквално„спржена“, потоа во Пулја, Калабрија, Лацио и во Кампања.

Грција веќе четврти ден води борба со пожарите. Сите граѓани добија СМС предупредување да избегнуваат акции кои можат да предизвикаат пожар. Десетина градови и села се евакуирани меѓу периферијата на Атина, па сè до островот Евиа и Пелопонез. Напорите на спасувачите се отежнати од силниот ветар и екстремно високата температура која деновиве достигна речиси до 47 степени целзиусови.

Повеќе од 150 пожари се распламтија во јужниот дел на Грција од вторникот до сега.

– Најтешкото допрва доаѓа зашто Грција е буре барут, шест региони се во црвено вклучувајќи го и регионот на Атика. Дополнителна загриженост предизвикуваат најавите за ветер од западен правец, изјави премиерот Мицотакис.

Властите на Евиа копаат ровови и сечат дрвја за огнот да не може да дојде до главниот град.

И пожарите во Турција траат безмалку десетина дена. Комбинацијата од силен ветар и екстремна горештина, не им одат во прилог на спасувачките и противпожарните екипи. Претседателот Ердоган вчера ја оквалификува состојбата дека е еднаква на закана од тероризам.

Најпогодени се туристичките региони Анталија и Мугла кои се ставени само делумно под контрола. Евакуирани се над десетици хотели, дел од туристите се транспортирани со бродови. Овие пожари се оценети за најстрашните во последната деценија.

И Шпанија и Португалија се зафатени од пожари. Информациите се исти насекаде, високи температури и ветрови и огнени стихии кои тешко се контролираат.

Според картата за итни случаи пак на Европската Унија, на која се претставени шумските пожари, големите и малите пожари што го зафатија целиот континент достигнуваат речиси до северниот дел на Русија и траат најмалку една недела. Но пожари има и во Канада, САД и Азија.