Сите истраги против граѓанските организации и фондации што претходната влада на Никола Груевски ги започна во 2016 година, а се одвиваа и во голем дел од 2017 година се официјално затворени и проверките покажале дека сите сомнежи се неосновани.

Ова вчера официјално им беше соопштено на претставници на овие невладини директно од министерот за внатрешни работи Оливер Спасовски, директорот на Бирото за јавна безбедност Лазо Велковски, директорот на Управата за финансиско разузнавање Блажо Трендафилов и директорот на Управата за финансиска полиција Арафат Муареми.

Според МВР, „не се обезбедени докази за субјектите кои се предмет на криминалистичката обработка“, за што е известено и Обвинителството.

-Врз основа на тоа, истражните органи до јавното обвинителство доставија предлог за затворање на истрагата, информираа од МВР.

Лани во ноември Владата ги затвори истрагите против невладините организации, што беа отворени на крајот од минатата година по најавата на поранешниот премиерот Никола Груевски дека ќе почне процес на „десоросоизација на општеството“.

На вчерашната средба било истакнато и дека во тек е истрага против тие што го иницирале политичкиот прогон преку злоупотреба на институциите на системот, но засега нема детали.

Веднаш по говорот на Никола Груевски на 17 декември 2016 пред ДИК, тогашната власт започна хајка против 21 невладина организација кои ги етикетираше како „непријатели на власта и на државата“, а како нивен финансиер го посочуваа сопственикот на фондацијата Сорос, Џорџ Сорос.

Со месеци во истрагите беа вклучени и МВР и УЈП, но беа пронајдени никакви докази за сомнително работење или направени прекршоци.

Во јануари 2017 беше формирани граѓанско здружение „Стоп Операција Сорос“, кое ја етикетираше Фондацијата Сорос како „радикална левичарска и тоталитарна“, и дека нејзината цел е „да се избришат идентитети, народи и нации и да се создаде едно  „отвореноопштество“ со кое ќе управува некој од надвор“, што според нив „сериозно ја загрозува безбедноста на Македонија преку своето делување“.

Како негови основачи во медиуите се појавуваа новинарите Цветин Чилиманов, Ненад Мирчевски и Никола Србов.