Елиминацијата на Италија од Шведска во баражот за Светското првенство во Русија однесе уште една фудбалска глава на Апенините. По Џанпјеро Вентура, под притисок на јавноста, медиумите и навивачите, оставка поднесе и првиот човек на италијанската федерација (ФИГЦ), Карло Тавекио (74).
Тавекио го презеде раководењето со Федерацијата во 2014 година. Беше предложен како претседателски кандидат од првиот човек на Лацио, Клаудио Лотито, но поддржан и од Ањели од Јувентус, Галијани од Милан, Перкаси од Аталанта и Презиоси од Џенова. Во битката за власт во ФИГЦ го победи Деметрио Албертини кој во трката најавуваше свежа крв во италијанскиот фудбал.
Тавекио ја почна кариерата како банкар меѓутоа набрзо влезе и во политиката. Цели 20 години беше градоначалник на неговото родно место Понте Ламбро паралелно со фудбалскиот стаж и функциите што ги имаше по разни организации и аматерски лиги. До 2007 година беше без посериозен ангажман и истата година, сепак, успеа да дотурка до позицијата потпретседател на ФИГЦ.
Италијанската јавност повеќе го памети по лоши одошто по добри нешта. Неговиот мандат беше исполнет со разни скандали за расизам, сексизам, корупција за што, велат, не е непозната сфера за него со оглед дека од 70. години на минатиот век дури пет пати бил осудуван за различни кривични дела како подмитување, фалсификување, затајување на данок. Но, поразот на Италија од Шведска во бараж двомечот за СП 2018 го стави во тесно и не остави многу простор за менавар, па понесување на одговорност и повлекување од функцијата дојде како единствена логична последица од него.