Членство на Република Македонија во НАТО, почеток на преговорите со Европската унија, продлабочување на соработката во сферата на безбедноста со цел стабилен регион, воздржување од радикална националистичка реторика и немешање во внатрешните работи на државите, се клучните пораки кои претседателот на Ѓорге Иванов ги искажа на состанокот на лидерите на Брдо Бриони процесот, што се одржува денеска во Брдо кај Крањ во Словенија.
Иванов истакнал дека националистичката реторика негативно влијае на добрососедските односи, а мешањето во внатрешните работи на соседните држави создава тензија. Според Иванов, суштината на процесот Брдо Бриони е регионот низ дијалог и со заемно почитување да ги решава предизвиците и проблемите. Иванов истакнал и дека долгогодишната „статус кво“ состојба во интеграциите ја продлабочила кризата во Македонија и им дала алиби на политичарите да застранат од зацртаниот европски пат.
„Една од клучните причини за стагнацијата, дури и за ретроградните процеси во регионот е недоволниот ангажман и недоволното внимание на ЕУ. Разбираме целосно дека ЕУ се соочува со повеќе кризи, но истовремено ЕУ не треба да дозволи уште една балканска криза“, порачал Иванов.
Тој ја повикал Европската Унија да извлече поуки за ефектите од досегашниот пристап кон Македонија и регионот, како и да изнајде креативен и иновативен начин особено за отворање на поглавјата 23. и 24., потенцирајќи дека отворањето на преговорите за правосудство, основните права, правда, слобода и безбедност ќе го дадат неопходниот поттик за интензивирање на реформските процеси.
„Крајно време е ЕУ да го промени пристапот кон Република Македонија и кон регионот. Крајно време е безбедносните служби да продолжат да соработуваат за сите да бидеме побезбедни“, рекол Иванов пред лидерите од регионот.
Иванов предложи на следниот самит на БрдоБриони процесот што треба да се одржи во Македонија, како специјален гостин да биде поканет премиерот на Грција Алексис Ципрас, претставници од Република Бугарија како претседавач со ЕУ, официјални претставници од ЕУ и Кралот на Јордан Н.В. Абдула, имајќи ги предвид безбедносните предизвици и проблемите поврзани со мигрантската криза, како и потребата за соработка со трети држави во однос на безбедноста.
Во однос на економијата, државите од БрдоБриони процесот се обврзуваат на продлабочување на економската соработка како придонес во сеопфатна заложба за стабилност и просперитет. За таа цел, мора да се вложува Југоисточна Европа да биде поатрактивна за инвестиции во транспортот, енергетската и дигитална инфраструктура, стои во заклучоците.
На состанокот на лидерите на Брдо Бриони процесот, чија домаќин е Словенија, учествуваат претседателите на Германија, Србија, Црна Гора, Косово Хашим Тачи, Албанија и Босна и Херцеговина.