Претседателот Ѓорѓе Иванов преку писмено соопштение до јавноста побара од премиерот Зоран Заев да му го достави предлогот за водење на преговори со уставна основа, нацртот на договорот, како и ставовите на делегацијата во водењето на преговорите.
„Во недостиг на клучни документи, а со цел обезбедување на поширок консензус за прашањето за името, претседателот на Република Македонија Ѓорге Иванов го охрабрува претседателот на Владата на Република Македонија Зоран Заев да ги достави предлогот за водење на преговори со уставна основа, нацртот на договорот, како и ставовите на делегацијата во водењето на преговорите, пишува во соопштението од Кабинетот на претседателот.
Во соопштението уште се додава дека Иванов останува на ставот дека не прифаќа решение за прашањето за името за севкупна употреба.
„Ставот на претседателот Иванов дека не прифаќа решение за прашањето за името за севкупна употреба или ерга омнес е основен непроменлив принцип, што е во согласност со утврдената правна рамка за водење на разговорите за разликата околу името во рамките на Обединетите нации и во никој случај не е насочен против интеграцијата на Република Македонија во Европската унија и во НАТО“.
Иванов смета дека треба да се постигне национален консензус за надминување на разликата околу името и изнаоѓање решение кое нема да го наруши достоинството на македонскиот народ и граѓаните.
Шефот на државата вчера беше брифиран за текот на преговорите за спорот за името од министерот за надворешни работи Никола Димитров.
„За да се реши спорот со името потребно е лидерство и највисока одговорност од сите политички фактори, изјави Димитров по средбата.
„За ова исклучително значајно прашање за разликата околу името, прашање што нè влече надолу и ни ја попречува иднината повеќе години, потребно е лидерство и највисока одговорност од сите политички фактори. Доколку најдеме начин да го затвориме овој проблем со зачувување на идентитетот и достоинството, сите заедно, ќе бидеме на правата страна на историјата“– рече Димитров.
Се очекува денеска македонскиот и грчкиот премиер Заев и Ципрас да имаат телефонски разговор за заокружување на договорента рамка за решението постигнато на последната средба меѓу Димитров и Коѕијас.