Вкупно 7.861 болни и изнемоштени лица го оствариле своето право на глас во вториот ден на предвремените парламентарни избори. Што се однесува до лицата кои се наоѓаат во домови за вонсемејна грижа, од вкупно 357 пријавени избирачи во оваа категорија, гласале 234, а во казнено-поправни установи 1.235 лица, соопшти портпаролот на ДИК, Адмир Шабани на синоќешната прес-конференција.
„Според податоците на ДИК, вкупно гласале 7.861 лице како болни и немоќни. Овие податоци ќе се докомплетираат кога одредени општински ибзорни комисии ќе ги достават своите податоци од гласањето на оваа категорија граѓани и во текот на утрешниот ден ќе ги објавиме сто отсто од податоците“, рече Шабани.
Од вкупно пријавените 357 лица во старечките домови, пак, правото на глас го оствариле 234, односно 80,62 отсто.
„Од гласачите кои се наоѓаат на издржување казна затвор во казнено-поправни установи, досега има добиено податоци за гласање на 1.235 лица. Треба да се достават податоци уште за КПУ Прилеп за да се комплетира бројката за оваа категорија на лица во целост. Од досега добиените податоци, излезеноста е 74,53 проценти“, појасни Шабани.
Денеска своето право на глас можеа да остварат 8.855 болни и немоќни лица, 357 граѓани во 17 старечки домови и 1.657 затвореници во 13 казнено-поправни установи. Вчера, на првиот ден на гласањето, за кандидатските листи се изјаснуваа 723 лица со Ковид-19 и во самоизолација.