Излезноста на денешните парламентарни избори во Шпанија, според досегашните податоци, е помала во споредба со изборите во април. Шпанското Министерство за внатрешни работи соопшти дека излезноста до 14 часот била 37,9 отсто, а на гласањето на 28 април во истото време изнесувала 41,5 отсто.
Лидерите на главните политички партии во земјата ги повикаа граѓаните да гласаат на парламентарните избори, стравувајќи дека излезноста ќе биде ниска.
„Никој да не останал дома“, е пораката што до гласачите ја испрати Алберт Ривера од партијата на десниот центар „Граѓани“ (Сиудадос).
Повик за излезност на избирачките места упатија и лидерот на Социјалистичката партија и премиер Педро Санчез, лидерот на Народната партија Пабло Касадо, како лидерот на партијата на екстремната левица „Обединети можеме“ (Подемос), Пабло Иглесиас.
Резултатите од испитувањето на јавното мислење предвидоа дека најмногу до 35 отсто од 37 милиони гласачи во Шпанија би можеле да излезат на изборите.
Предизборните анкети покажаа дека Социјалистичката партија повторно ќе победи, но со помал или ист број пратенички места во Парламентот, односно околу 120 од 350 мандати, со што нема да има мнозинство.