Шпанскиот Парламент со претставници на екстремни десничари по речиси четири децении. Партијата „Вокс“ на вчерашните предвремени парламентарни избори освои 24 пратенички места колку што предвидуваа и анкетите.
„Вокс“ на политичката сцена во Шпанија се појави во декември во минатата година кога лидерот на партијата Сантијаго Абаскал прифати да влезе во коалиција по регионалните избори во Андалузија. Нејзините членови не се декларираат како ултрадесничари туку само како десничари кои се против независноста на Каталонија и на мигрантите.
„Вокс се појавува на политичката сцена, нуди нешто ново и ги исполнува желбите за политичка промена. Изборите стануваат се поемотивни, се игра на чувствата“, изјави Хосе Игнасио Торебланка од Европскиот совет за меѓународни односи во Мадрид.
Тој додаде дека слични трендови има во Италија, во Франција и во Велика Британија, како и дека специфичностите на секоја од земјите одредуваат дали ќе се појават нови радикални политички проекти од левицата, десницата или независно од традиционалните поделби.
Во случајот на Шпанија таквите специфични околности првенствено се однесуваат на барањето за независност на Каталонија, што доведе до собирање околу десничарските идеи за национализмот, но и на тврдите ставови за илегалната миграција.
„Вокс“, според Торебланка, е „социјално конзервативна партија, но многу либерална во економска смисла за разлика, на пример, од францускиот Национален фронт. И аналитичарот Петер Церети од Економист наведува дека „Вокс“ има изразито демократски карактер за разлика од унгарската „Фидес“ и полската партија „Закон и правда“.
„Тие не се екстремно десни во смисла дека им е блиска фашистичката идеологија, како кај радикалните популистички десни партии на Истокот. Станува збор за националистичка партија која негува културен конзервативизам“, истакна Церети.
Според прелиминарните резултати врз основа на 99 проценти од преброените гласови, Шпанска социјалистичка работничка партија (ПСОЕ) на премиерот Педро Санчез, победи на изборите. ПСОЕ освои 123 мандати од вкупно 350 места во шпанскиот Парламент. Партијата на центарот „Граѓани“ доби 57 мандати, конзервативната Народна партија (ПП) освои 66 места, а левичарската Подемос доби 42 места.
Според освоените гласови ниту една партија не може сама да формира влада, па следи период на долги преговори за идната коалиција.