Речиси 37 милиони државјани на Шпанија со право на глас денеска излегуваат на предвремени парламентарни избори. Граѓаните ќе гласаат за 350 членови на Парламентот и за 208 членови на Сенатот, тело што ги претставува покраините во кое од 2011 година доминира конзервативната Народна партија (ПП). Избирачките места ќе бидат отворени до 20 часот, а резултатите се очекуваат неколку часа подоцна.
Денешните парламентарни избори во Шпанија важат за најнеизвесни во последните неколку децении. Дури една третина од потенцијалните гласачи се изјасниле дека сè уште не одлучиле за кого ќе го дадат гласот. Во зависност од резултатите, експертите предвидуваат формирање на коалициска влада што ќе биде прва по враќање на демократскиот систем во земјата кон крајот на 70-тите години од минатиот век. Но, очекувања се однесуваат и на прв влез на ултрадесничарски пратеници во Парламентот по 1982 година.
Според анкетите ниту една партија нема да освои доволно пратеници за сама да формира влада, а во трка се традиционалните партии на левиот и десниот центар – Шпанска социјалистичка работничка партија (ПСОЕ) и Народна партија (ПП), левичарската „Подемос“, партијата на центарот „Граѓани“ и десничарската „Вокс“.
Анкета објавена во „Ел Паис“ покажува најголема поддршка за социјалистите на премиерот Педро Санчез, кои би можеле да добијат нешто помалку од 30 проценти од гласовите, со што ПСОЕ би можела да ја предводи коалициската влада.
Посебно непредвидлив е резултатот на десничарската „Вокс“ која на почетокот од годината оствари неочекуван историски висок резултат на регионалните избори во јужната покраина Андалузија. „Вокс“ е против независноста на Каталонија и мигрантите, но себе си се смета за десница, а не крајна десница. Ако нејзини членови бидат избрани, тие ќе бидат први десничари во Парламентот по речиси четири децении.
Резултатите од денешните парламентарни избори ќе влијаат и врз локалните и регионални избори што се закажани на 26 мај, кога се одржуваат и изборите за Европскиот Парламент.
Можни постизборни сценарија се формирање на коалиција на десните партии или пак распишување на нови избори, ако партиите не се договорат.
Второ сценарио е Санчез да остане премиер ако формира коалиција со „Подемос“. Но, анкетите покажуваат дека ќе им е потребна поддршка и од регионалните партии, пред се од оние од Каталонија, кои се приврзаници на независноста.
Трето сценарио би била коалиција помеѓу ПСОЕ и Граѓаните, но лидерот на партијата од центарот Алберт Ривера однапред ја отфрли можноста за коалиција со Санчез.
Речиси 40 години во Шпанија функционираше двопартискиот систем, кој почна да се урива во 2015 годна. Левиот и десниот центар, ПСОЕ и ПП константно се менуваа на власт, но најверојатно повеќе нема да можат самостојно да формираат влада.