Published: Saturday, July 3, 2021 11:32
На изложбата во Музејот на Град Скопје на чие отворање синоќа присуствуваше и градоначалникот Петре Шилегов, се изложени дела од петнаесет меѓународни автори кои беа селектирани на отворен конкурс од кураторот Пјетро дела Џустина. Изложбата, во организација на Град Скопје, ќе биде отворена еден месец.
– Градот Скопје како дел од меѓународниот проект CreArt, Мрежата на градови за уметничко творештво, изминатите четири години ги искористи за да одговори на одредени потреби што ги споделуваат европските културни институции и уметници. Со овој проект, Град Скопје внесува иницијативи во културниот живот во Скопје во полето на визуелните уметности преку воспоставување нови меѓународни партнерства и размени. Истовремено, им овозможуваме учество на уметниците и кураторите од Скопје во програмските активности, да креираат, изложуваат и да уживаат во уметничките дела, како и да добијат пристап до обуки преку семинари, резиденции на уметници, работилници и истражувачки програми кои се одржуваат во јавни и приватни културни институции во градовите-партнери во проектот, истакна Шилегов.
Оваа година, Град Скопје промовира уште една активност на проектот CreArt. Тоа е големата „Европска изложба“ поставена во Музејот на Град Скопје, а во чија презентација учествуваа уште два партнерски града, Авеиро од Португалија и Џенова од Италија. Изложбата има за цел да го промовира и рефлектира еден од основните приоритети на проектот – на едно место да бидат собрани десетици креативни таленти од Европа со нивните различни културни багажи и различни гледишта.
На поставката можат да се видат дела на уметниците Аисте Амбражевичиуте, Хорхе Пелигро, Родриго Малвар, Серена Граси, Симон Попиелец, Анти-кул, Весна Саламон, Бернард, Дарко Алексовски, Жан Ромео Камптчуанг, ОПА (Опсесивна посесивна агресија), Полиморф, Валентина Траверс, Сара Вигиер и Стефано Серета.