Извршниот комитет на ВМРО-ДПМНЕ вечерва, а Централниот комитет утре треба да одлучат дали ќе се одложи конгресот за избор на претседател на партијата за во февруари, како што побараа истакнати партиски членови.
На два дена пред почетокот на дводневниот конгрес ситуацијата се појави писмо на кое се потпишани триесет истакнати членови на ВМРО-ДПМНЕ, меѓу кои, и Илија Димовски и Антонијо Милошоски. Имињата на овие двајца пратеници се споменуваа како можни кандидати за претседател на партијата.
Покрај нив на писмото е потпишан и поранешниот претседател на Собранието Трајко Вељаноски, но од потписниците само тројца се членови на Извршниот комитет кој има вкупно 32.
Во писмото испратено до членовите на ВМРО-ДПМНЕ и до ИК и ЦК на партијата, тие меѓу другото бараат одлагање на конгресот до февруари, а до тогаш со партијата да раководи колективно претседателство, бидејќи стравуваат дека конгресот во моментов е загрозен од наместен избор и дека се агитира за еден кандидат, за кој како што тврдат потписниците, се трошеле партиски ресурси, се врши притисок врз добар дел од делегатите да се потпишат зад неговата кандидатурат, се праќаат и вистинити и лажни поздрави до делегатите од влијателни личности во врвот на партијата со цел добивање на поддршка за едниот кандидат и се користат закани за исклучување од партијата и од органите на партијата на лица кои ќе одбијат да дадат поддршка на едниот кандидат.